އިޚްލާޞްތެރި މުދައްރިސެއް

އަލްފާޟިލް އަޙްމަދު ރަޝީދު ނުވަތަ އާންމު ނަމުން ނަމަ ދޮންބެ އަކީ، ހއ.ހޯރަފުށީ އަލަނާސިގޭ މުޙައްމަދު ޔޫސުފާއި ހއ.އިހަވަންދޫ ނެދުންގޭ ޖަމީލާ އާދަމްގެ 7 ކުދިންގެ ތެރެއިން 4 ވަނަ ދަރިފުޅެވެ. ދޮންބެ އުފަންވެފައި ވަނީ، 1974 ފެބްރުއަރީ 5 ގައެވެ. އަލިބެ އާދަނު އާއިލާ އަށް ނިސްބަތްވާ ދޮންބެ މިހާރު އުޅެމުން ދަނީ ހއ.އިހަވަންދޫ އާހިޔާ ގައެވެ.                                         

އުޅުމަގައި މަޖާ ގޮތެއް ހުންނަ ދޮންބެ އަކީ ކިޔެވުމަށް ވަރަށް ޝަޢުޤުވެރިކަން ހުންނަ މީހެކެވެ. އެގޮތުން ސުކޫލު ދައުރުގައިވެސް ދޮންބެ ވަނީ ކުލާހުންނާއި ޤުރުޢާން މުބާރަތް ތަކުން އެކިއެކި ވަނަތައް ޚާޞިލް ކޮށްފައެވެ. ގުރޭޑް 1 – 6 އިހަވަންދޫ މަދަރުސާގައި ދޮންބެ ތަޢުލީމު ޙާޞިލް ކޮށްފައިވާއިރު، ގުރޭޑް 7 – 10 ތަޢުލީމު ޙާޞިލް ކޮށްފައިވަނީ މާލޭގެ ސުކޫލެއް ކަމަގައިވާ މަދަރުސަތުލް އަޙްމަދިއްޔާގައެވެ. ޖީސީއޯލެވެލްއިން 2 މާއްދާ
ފިޔަވައި ހުރިހާ މާއްދާއިން ފާސްވެ އޭލެވެލްވެސް ދޮންބެ ހަދާފައިވެއެވެ. އެޑްވާންސް ސެޓްފިކެޓް އިން އިސްލާމް އިން ފުރަތަމަ އަދި ދެވަނަ ދަރަޖަ (ސެކެންޑަރީ އިސްލާމް ޓީޗިންގް) އާއި ޑިޕްލޮމާ އިން ސެކެންޑަރީ އިސްލާމް ޓީޗިންގް އާއި ބެޗްލަރ އޮފް އިސްލާމް ޓީޗިންގް އޮނާސް އަދި ޑިޕްލޮމާ އިން ސުކޫލް މެނޭޖްމެންޓް ކޯސްތައް ދޮންބެ ފުރުއްވާފައިވެއެވެ. ކުއްލިޔަތުލް ދިރާސަތުލް އިސްލާމިއްޔާ އަދި ޤައުމީ ޔުނިވާސިޓީގައި އެކިއެކި ކޯސްތައް ފުރުއްވާފައި ވެއެވެ. 13 އަހަރު ތަޢުލީމީ ދާއިރާގައި ދޮންބެ ޚިދުމަތް ކޮށްފައިވާއިރު ތަފާތު އެކި މަޤާމްތައް ދޮންބެ ފުރުއްވާފައިވެއެވެ. އަދި މިހާރުވެސް ދަނީ ފުރުއްމަވުންނެވެ. އެގޮތުން ވަގުތީ ޓީޗަރ ކަމާއި އެސިސްޓެންޓް ޓީޗަރ ކަމާއި އިސްލާމް މުދައްރިސްކަމާއި ސުޕަވައިޒަރ ކަންވެސް ކޮށްފައިވެއެވެ. އަދި މިނިސްޓްރީ އޮފް އިސްލާމިކް އެފެއާޒްގެ ހުކުރުކުރާ އިމާމުގެ މަޤާމްވެސް ފުރުއްވަފައިވާއިރު، މިހާރު ފުރުއްވަމުންދާ މަޤާމަކީ، އިހަވަންދޫ މަދަރުސާގެ މަތީސާނަވީގެ އިސްލާމް މުދައްރިސްކަމާއި ކޮލިފައިޑް ލީޑިންގް ޓީޗަރކަމެވެ. އަދި އިސްލާމް އަދި ދިވެހި މާއްދާގެ އެޗް.އޯ.ޑީ ކަންވެސް ކޮށްފައިވެއެވެ.                                                    

ދޮންބެ ވަނީ އިމަގު ޖަމިއްޔާގެ 3 ވަނަ ރައީސް ކަމާއި ސެކްޓަރީކަން ހިލޭ ސާބަހަށް ކޮށްދީފައެވެ. އިހަވަންދޫ މަދަރުސާގައި ގުރޭޑް 8 އުފެއްދުމަށްޓަކައި ދަރިވަރުންނަށް ހިސާބާއި ސޯޝަލް ސްޓަޑީޒް ކިޔަވާދީފައިވާއިރު، ގުރޭޑް 8 އުފެދުމުން އިސްލާމިކް ސްޓަޑީޒް، އެކޮނޮމިކްސް އަދި އެކައުންޓިންގް ދަރިވަރުންނަށް ދޮންބެ ކިޔަވާދީފައިވެއެވެ. ޙަޔާތުގެ ދުވަސްތައް މާލޭގައި ގުނަމުން ދިޔައިރު، އޯލެވެލް ނިންމާލާފައި ވަނީ އާއިލާގެ މާބޮޑު ދައުރެއްނެތިއެވެ. ޙަޔާތުގެ ބުރަތައް މިގޮތަށް އުފުލައިފާވާއިރު، ކޯސްތައް ފުރިހަމަ ކުރުމަށްޓަކައި އާއިލާ އާއި ދުރުގައި ހުރެގެން، އާމްދަނީ ހޯދަމުން ދޮންބެ މަސައްކަތް ކޮށްފައިވެއެވެ. އަދި އިހަވަންދޫ މަދަރުސާގެ ކުދިންގެ އަޚްލާގާއި ކިޔެވުން ރަނގަޅު ކުރުމަށްޓަކައި އިޚްލާޞްތެރިކަމާއެކު ދޮންބެ މަސައްކަތް ކޮށްފައިވެއެވެ. އެގޮތުން ޓީޗަރުންގެ ފިލާވަޅުތައް ބެއްލެވުމާއި، ދަރިވަރުންނަށް ކައުންސިލިންގް ދިނުމާއި ސުކޫލު މެނޭޖްމެންޓް މަޝްވަރާއަށް ޚިޔާލުދިނުމާއި ސުކޫލުގެ ކުށްތައް ތަންފީޒް ކުރުމުގައި އިސްރޯލެއް އަދާކުރިއެވެ. އަދި އިހަވަންދޫ މަދަރުސާގައި ގުރޭޑް 11 އުފެއްދުމަށްޓަކައި ކުދިންގެ ނަތީޖާ ރަނގަޅުކުރުމަށް ބެލެނިވެރިންނާއި ދަރިވަރުންނާ މަޝްވަރާ ކޮށްފައިވެއެވެ. ހުދު ކުލަ ރީތި ކުލައެއްގެ ގޮތުގައި ދެކޭ ދޮންބެއަށް އެންމެ މީރު ކެއުމަކީ ގަރްދިޔައާއި ލޮނުމިރިހާއި ބަތެވެ. އަދި އެންމެ މީރު ފަންޏަކީ ކުރުނބާ ފަންޏެވެ.                 

އެންމެ ޝަޢުޤުވެރިވާ ކަމެއްގެ ގޮތުގައި ދޮންބެ ފާހަގަކޮށްފައިވާ ކަމަކީ، މީހުންނަށް އިސްލާމްދީނުގެ ދަޢުވަތު ދިނުމެވެ. ދޮންބެއަށް ލިބޭ ހުސްވަގުތުތަކުގައި ކޮށްއުޅޭ ކަންކަމަކީ އިސްލާމްދީނާ ބެހޭ ފޮތްތައް ކިޔުމާއި ޤުދުރަތީ މަންޒަރުތަކާމެދު ވިސްނާ ފިކުރުކޮށް އަމިއްލަ ކުރިއެރުންތަކާމެދު ވިސްނާ ފިކުރުކުރުމެވެ. ދޮންބެއަށް ލިބުނު ނާކާމިޔާބީ ތަކެއްގެ ގޮތުގައި ފާހަގަކޮށްފައިވަނީ، ޢަރަބި ބަހުން ތަޢުލީމު ޙާޞިލް ކުރުމައި އަޙްމަދިއްޔާގައި އުޅުނިއިރު ސީ.އެޗް.އެސް.ސީ އިން މަތީ ސާނަވީ ކިޔެވުމުގެ ފުރުޞަތު ހޯދުމުގެ އިތުރުން ވިޔަފާރިވެރިއަކަށްވުމެވެ. އެންމެ ދެކެން ބޭނުއްވާ ދުވަހެއްގެ ގޮތުގައި ދޮންބެ ފާހަގަކޮށްފައިވާ ދުވަހަކީ ދޮންބެ ތަޤްވާވެރިއެއްގެ ގޮތުގައި ހުރެ ދަރީންނާއި އަނބިމީހާވެސް ތަޤްވާވެރި ބައެއްގެ ގޮތުގައި ދުށުމެވެ. ދޮންބެ ޖަވާޒީ ޙަޔާތެއް ފައްޓަވާފައިވަނީ 2001 ވަނަ އަހަރުއެވެ. އެންމެ އުފާވި ދުވަހެއްގެ ގޮތުގައި ދޮންބެ ފާހަގަކޮށްފައިވަނީ އެންމެ ފުރަތަމަ ދަރިފުޅު (މައިޝާ) ލިބުނު ދުވަހެވެ. ދޮންބެގެ ކައިވެންޏަށް 12 އަހަރު ފުރިފައިވާއިރު ދޮންބެއަށް ލިބިފައިވަނީ 2 ކުދިންނެވެ އެއީ، އަންހެއް ކުއްޖަކާއި ފިރިހެނަ ކުއްޖެކެވެ. އެންމެ ދެރަވި ދުވަހެއްގެ ގޮތުގައި ފާހަގަކޮށްފައިވަނީ ދޮންބެގެ މަންމަ ނިޔާވި ދުވަހެވެ.                   

ދޮންބެ ކިޔަވަދިނުމުގެ ދާއިރާއިން 13 އަހަރު ވަންދެން މަސައްކަތް ކޮށްފައިވާއިރު، ޤައުމަށް ގިނަގުން ޚިދުމަތްތަކެއްވަނީ ކޮށްދީފައެވެ. މިހާރުވެސް ދޮންބެ ކިޔަވަދިނުމުގެ ދާއިރާގައި މަސައްކަތް ކުރަމުން ދާއިރު ގިނަ ދަރިވަރުން ދޮންބެގެ ފަރާތުން އުނގެނެމުން ދެއެވެ. ދޮންބެ އިލްތިމާސް ކުރަނީ، "ދަރިވަރުން އެއްވެސް ޙާލެއްގައި ކިޔެވުން ހުއްޓާނުލާ، އުނގެނޭ ޢިލްމެއްގެ ބޭނުން އޭގެ ހެޔޮގޮތަގައި ބޭނުން ކުރުމެވެ. އަދި  ކޮންމެ ކުއްޖަކުވެސް މަރުވުމުގެ ކުރިން ފުރިހަމަ ތަޤްވާވެރިއަކަށްވެ، މައިންބަފައިންނާއި އެހެން މީހުން ދެކެ ލޯބިވާ، އެމީހުންގެ ލޯބި ލިބިގެންވާ ބައެއްގެ ގޮތުގައި ވުމުވެ."