ދިވެހިބަސް ކިޔަވަން ޝަޢުޤުވެރިވާނީ ދިވެހިބަސް ކިޔަވާދޭން ގެންގުޅޭ ވައްޓަފާޅި ބަދަލުކޮށްގެންނެވެ

ދިވެހިރާއްޖޭގެ ކޮންމެ ސުކޫލެއްގައި ދިވެހިބަސް މާއްދާއެއްގެ ގޮތުގައި ކިޔަވާދޭއިރު، ދަރިވަރުންގެ ނަތީޖާ ދުވަހެއް ދުވަހަކަށް އަންނަނީ ދައްވަމުންނެވެ. ސަބަބަކަށް މެދުވެރިވަނީ، މުދައްރިސުން ކިޔަވާދިނުމުގައި ދަރިވަރުންގެ ޝަޢުޤުވެރިކަން ނެތުމާއެކު، ކިޔަވާދޭ ވައްޓަފާޅި ދަރިވަރުންނާ ނުގުޅުމެވެ. އެހެންކަމުން އެކަން ރަނގަޅު ކުރުމަށްޓަކައި ކިޔަވައިދިނުމުގައި ދަރިވަރުންގެ ބައިވެރިވުން އިތުރުކޮށް، ކުލާހުގައި އިތުރު ހަރަކާތްތައް ކުރިޔަށް ގެންގޮސް، ޕްރޮޖެކްޓް ވޯކުތައް ޙަވާލުކުރުމުގެ އިތުރުން ފިލާވަޅުތައް ނަގާދޭއިރު އެފިލާވަޅުތަކާ ގުޅޭ ތަންތަނަށް ދަރިވަރުން ގެންގޮސް ފިލާވަޅުތައް ކުރިޔަށް ގެންދެވިދާނެއެވެ.                                    

މުދައްރިސުން ދިވެހިބަސް ކިޔަވަދިނުމުގައި ދަރިވަރުން ބައިވެރިކޮށްގެން ފިލާވަޅުތައް ކުރިޔަށް ގެންދިޔުމުގެ ސަބަބުން އެކުދިންގެ ޝަޢުޤުވުރިކަން އިތުރުވެދެއެވެ. އެގޮތުން ޙަވާލުކުރެވޭ ގުރޫޕް މަސައްކަތްތައް ކުލާހަށް ހަށަހަޅާ ދިނުމަށް ދަރިވަރުންނަށް ފުރުޞަތު ދިނުމާއެކު ފިލާވަޅު ނަގާދީ ނިމުމަށްފަހު، ފިލާވަޅާ ބެހޭގޮތުން އެކުދިންނަށް ދަސްވި މިންވަރު ބެލުމަށްޓަކައި އެކުދިންނާ ސުވާލުކުރެވިދާނެއެވެ. ހަމައެހެންމެ އެކުދިންނާ ސުވާލުކުރުމުގައި އެކުރާ ސުވާލެއްގެ ޖަވާބު ބެލުމަށްޓަކައި އެހެންކުއްޖަކު ބައިވެރި ކުރެވިދާނެއެވެ. ވީމާ، ކިޔަވައިދިނުމުގައި ދަރިވަރުން ބައިވެރިވާ ބައިވެރިވުން އިތުރުކޮށް އެކުދިންނަށް ކުލާހުގައި އިތުރު ޙަރަކާތްތައް ކުރިޔަށް ގެންދެވިދާނެއެވެ.                  

މުދައްރިސުން، ދަރިވަރުންގެ ފިލާވަޅުތަކާއި ގުޅުވާގެން ކުލާހުގައި އިތުރު ޙަރަކާތްތައް ހިންގިދާނެއެވެ. އެގޮތުން ގުރޫޕްތަކަށް ބަހައިލާގެން ވާދަވެރިކަމާއެކު ބަހުސްކުރެވިދާނެއެވެ. ހަމައެހެންމެ ވަކިކަމަކަށް އަލިއަޅުވައިލާ ޑްރާމާ ކުޅުމުގެ ބައެއްވެސް ކުރިޔަށް ގެންދެވިދާނެއެވެ. އަދި ހަމައެޔާއެކު ކުދިންގެ އެކިއެކި ތަފާތު ހުނަރުތައް ދައްކާލުމުގެ ގޮތުން ޕްރޮގުރާމް އެއް ކުރިޔަށް ގެނަދެވިދާނެއެވެ. އެގޮތުން ވާހަކަ ކިޔުމުގެ ހުނަރުތަކާއި ދިވެހި މަދަޙަ އާއި ދިވެހި ރައިވަރާއި ޅެން ކިޔުމުގެ ހުނަރުތައް ބޭއްވިދާނެއެވެ. ނަތީޖާއަކަށްވާނީ، އެކުދިންގެ ޝަޢުޤުވެރިކަން ދިވެހި ބަހަށް ދެވި، އެކަންކަމުގައި ގިނައިން ޝާމިލުވެވޭތައް އައުމެވެ. ހަމައެހެންމެ ތަފާތު ޕްރޮޖެކްޓް ވޯކްތައް ހެދުމަށް ފަސޭހަވާނެއެވެ.                                                          

މުދައްރިސުން ނަގައިދޭ ބޮޑެތި ފިލާވަޅުތަކާ ގުޅޭ ގޮތުން ޕްރޮޖެކޮޓޮ ވޯކުތައް ދަރިވަރުންނަށް ޙަވާލުކުރެވިދާނެއެވެ. އެގޮތުން ދިވެހި ބަހަށް ގިނަ ދުވަހު ޚިދުމަތް ކޮށްދެއްވާފައިވާ ޚާއްޞަ ފަރާތްތަކާ ގުޅޭގޮތުން އެބޭފުޅުންގެ މަޢުލޫމާތު ލިބިދޭ ގޮތަށް ލުއި ފޮތް ހެދުމުގެ މަސައްކަތްތައް ޙަވާލު ކުރެވިދާނެއެވެ. އަދި ހަމައެހެންމެ، އަދަބިއްޔާތުގެ ބައިން އިމްތިޙާނުގައި އިމްތިޙާނު ކުރެވޭ ވަޒަން ބަހުރުވައިގެ ދެބައި ކަމުގައިވާ ރައިވަރު އަދި ޅެމަށް ދަރިވަރުން އަޙުލުވެރި ކުރުމުގެ ގޮތުން ޕްރޮޖެކްޓް މަސައްކަތްތައް ދަރިވަރުންނަށް ޙަވާލު ކުރެވިދާނެއެވެ. ޕްރޮޖެކްޓް ތަކުގެ އިތުރުން ފިލާވަޅު ތަކާއި ގުޅޭ ތަންތަނަށް ދަރިވަރުން ގެންދެވިދާނެއެވެ.                                   

މުދައްރިސުން ފިލާވަޅުތައް ނަގާދޭއިރު އެފިލާވަޅުތަކާ ގުޅޭ ތަންތަނަށް ދަރިވަރުން ގެންގޮސް ފިލާވަޅުތައް ކުރިޔަށް ގެންދެވިދާނެއެވެ. އެފިލާވަޅެއްގެ ޚާއްޞަ ބަޔަކާއި ދަރިވަރުން އެގެންދާ ތަނާއި ގުޅުވާލުމުގެ ސަބަބުން ދެވޭ މަޢުލޫމާތު ތާޒާވެ މުއްސަނދި ވެދެއެވެ. އެގޮތުން އަދީބުންގެ ފިލާވަޅުތައް ނަގާދޭއިރު، އެބޭފުޅުންގެ އިޚްލާޞްތެރި، އަދަބުވެރި މަސައްކަތްތަތް ފެންނަށް ހުންނަ މަރުކަޒުތަކަށް ދަރިވަރުން ގެންގޮސް، ފިލާވަޅުތައް ކުރިޔަށް ގެންދެވިދާނެއެވެ. އަދި ހަމައެހެންމެ ރައިވަރާއި ޅެމައި ވާހަކަ ފަދަ ފިލާވަޅުތައް ނަގައިދިނުމުގައި ލައިބްރަރީއަށް ޒިޔާރަތްކޮށް އެފަދަ މަޢުލޫމާތު ލިބިދޭ ފޮތްތައް ދަރިވަރުންނަށް ދެއްކިދާނެއެވެ. މިކަމުގެ ސަބަބުން ދަރިވަރުންގެ ޝަޢުޤުވެރިކަން ދިވެހި ބަހަށް ލިބި، ދިވެހި ބަސް ދިރުވައި އާލާ ކުރުމަށް ދަރިވަރުން މަސައްކަތް ކުރާނެއެވެ.                        

ކިޔަވައިދިނުމުގައި ދަރިވަރުންގެ ބައިވެރިވުން އިތުރުކޮށް، ކުލާހުގައި އިތުރު ޙަރަކާތްތައް ކުރިޔަށް ގެންގޮސް، ދަރިވަރުންނަށް ފިލާވަޅުތަކާ ގުޅޭ ގޮތުން ޕްރޮޖެކްޓް ވޯކްތައް ޙަވާލުކުރުމުގެ އިތުރުން ފިލާވަޅުތައް ނަގާދޭއިރު އެފިލާވަޅުތަކާ ގުޅޭ ތަންތަނަށް ދަރިވަރުން ގެންދިޔުމުން ކުރިން ދިވެހިބަސް ކިޔަވާދޭން ގެނަގުޅޭ ވައްޓަފާޅި ބަދަލު ކުރެވިދާނެއެވެ.